Voice of Asia News

عالمی منڈیوں پر گرفت کیلئے ویلیو ایڈیشن انڈسٹری کی جانب سفر کی رفتار کو مزید تیز کرنا ہوگا ‘ کارپٹ ایسوسی ایشن

اسلام آباد/لاہور (وائس آف ایشیا) پاکستان کارپٹ مینو فیکچررز اینڈایکسپورٹرز ایسوسی ایشن نے ترمیمی فنانس بل کے ذریعے سرمایہ کاری ، برآمدات اورصنعتوں کے فروغ کیلئے اقدامات کو قابل ستائش قرار دیتے ہوئے کہا ہے کہ سو فیصد نتائج حاصل کرنے کیلئے وزیر اعظم اور وزیر خزانہ کی زیر صدارت ہر ماہ ’’ فالو اپ ‘‘اجلاس کا انعقا د کیا جائے ،حکومت معیشت کی ترقی کیلئے برآمدی انڈسٹری سے جڑے تمام شعبوں پر توجہ مرکوز کرے اور ان کی راہ میں حائل رکاوٹیں دور کی جائیں،جرمنی میں منعقدہ ’’ڈومو ٹیکس ‘‘ نمائش میں پاکستانی کارپٹ کی مصنوعات کو بھرپور پذیرائی ملی ہے جوحوصلہ افزاء ہے۔ان خیالات کا ظہار ایسوسی ایشن کے سینئر مرکزی رہنما عبد اللطیف ملک نے حکومت کی جانب سے پیش کئے جانے والے ترمیمی فنانس بل اور جرمنی میں منعقد ہ نمائش میں شرکت کے حوالے سے منعقدہ اعلیٰ سطحی اجلاس میں خطاب کرتے ہوئے کیا۔اس موقع پر سینئر وائس چیئرمین اعجاز الرحمن، کارپٹ ٹریننگ انسٹی ٹیوٹ کے چیئر پرسن سعید خان ، ایسوسی ایشن کے سینئر ممبر ریاض احمد ، اکبر ملک اور میجر (ر) اختر نذیر سمیت دیگر بھی موجود تھے۔اجلاس میں ’’ ڈومو ٹیکس ‘‘ نمائش میں شرکت کرنے والے وفد نے شرکاء کو پاکستانی کارپٹ مصنوعات کو ملنے والی پذیرائی اور خصوصاً غیر ملکی خریداروں سے ہونے والے ملاقاتوں کے حوالے سے تفصیلی آگاہ کیا۔پی سی ایم ای اے کے وفد کی دعوت پر متعددغیر ملکی خریداروں نے پاکستان آنے کی یقین دہانی بھی کرائی ہے۔ عبد اللطیف ملک نے خطاب کرتے ہوئے کہا کہ حکومت کی جانب سے ترمیمی فنانس بل کے ذریعے معیشت کو سنبھالا دینے کیلئے خصوصی اقدامات قابل ستائش ہیں۔پاکستان کی عالمی منڈیوں پر گرفت اورخصوصاًہمسایوں سمیت دیگر ممالک کا بھرپور مقابلہ کرنے کیلئے ویلیو ایڈیشن انڈسٹری کی جانب سفر کی رفتار کو مزید تیز کرنا ہوگا۔ حکومت برآمدی انڈسٹری سے جڑے تمام شعبوں پر توجہ مرکوز کرے اور انہیں درکار سہولیات فراہم کی جائیں۔ انہوں نے کہا کہ پاکستان میں انڈسٹری کو مراعات اور سہولیات دینے سے نہ صرف مقامی بلکہ بیرونی سرمایہ کار بھی راغب ہوں گے جس سے روزگار کے مواقع بڑھیں گے اور ہماری معیشت کو ترقی ملے گی۔

image_pdfimage_print

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے