کراچی سے تعلق رکھنے والی اداکارہ ماہ نور بلوچ نے شوبز سے علیحدگی اختیار کر لی‘ ذرائع

 لاہور(وائس آف ایشیا)کراچی سے تعلق رکھنے والی اداکارہ ماہ نور بلوچ نے شوبز سے علیحدگی اختیار کر لی ۔ ذرائع کے مطابق ماہ نور بلوچ نے اپنی گھریلو مصروفیات کی وجہ سے ٹی وی اور فلموں سے کنارہ کشی اختیار کر لی ہے ۔ ان کو حال ہی میں دو ڈرامہ سیریلز میں کام کرنے کی پیشکش ہوئی تھی لیکن انہوں نے یہ کہہ کر معذرت کر لی کہ وہ گھریلو مصروفیات کی وجہ سے کسی پراجیکٹ میں کام نہیں کریں گی ۔ دوسری جانب ذرائع کا کہنا ہے کہ ماہ نور بلوچ نے اپنے شوہر کے کہنے پر شوبز سے مکمل کنارہ کشی اختیار کر لی ہے تاہم اس حوالے سے اداکارہ ماہ نور بلوچ کا اپنا موقف سامنے نہیں آ سکا۔
وائس آف ایشیا19جون 2019 خبر نمبر74




ہمیں آئٹم نمبرز کی بیماری سے جان چھڑانی ہوگی‘حمزہ علی عباسی

کراچی(وائس آف ایشیا) پاکستانی اداکارومیزبان حمزہ علی عباسی نے آئٹم نمبرز کو بیماری قرار دیتے ہوئے کہا ہے کہ ہمیں آئٹم نمبرز سے جان چھڑانی ہوگی۔حمزہ علی عباسی اداکاری اور میزبانی میں تو اپنی صلاحیتوں کا لوہا منوا چکے ہیں اور اب وہ ایک رئیلٹی شو کے جج کے فرائض انجام دے رہے ہیں۔ شو میں ان کے ساتھ لیجنڈ اداکار جاوید شیخ اورکبریٰ خان بھی شامل ہیں۔ شو کے دوران ایک لڑکی نے مہوش حیات کے آئٹم نمبر بلی پر ڈانس کرکے اپنا ٹیلنٹ دکھایا۔ لڑکی کے ڈانس پر جاوید شیخ اور کبریٰ خان نے تو اپنی اپنی رائے کا اظہار کیا، تاہم حمزہ علی عباسی نے لڑکی کو آئٹم نمبر پر ڈانس کرنے پر سبق سیکھاتے ہوئے آئٹم نمبر کی ایک بار پھر کھل کر مخالفت کرڈالی۔حمزہ علی عباسی نے پاکستانی فلمسازوں سے درخواست کرتے ہوئے کہا کہ مہربانی کرکے اپنی فلموں میں آئٹم نمبرز شامل نہ کریں۔ یہ ہمارا اور ہمارے فلمسازوں کا قصور ہے کہ ہم اپنی فلموں میں آئٹم نمبرز شامل کرتے ہیں۔ مجھے بہت دکھ ہوا کہ ایک 16 سال کی بچی آئٹم نمبر پر ڈانس کررہی ہے۔حمزہ نے آئٹم نمبرز کو فلموں کے لیے بیماری قراردیتے ہوئے کہا کہ اس سے بالی ووڈ بھی اپنی جان چھڑانا چاہ رہاہے۔ کیونکہ آئٹم نمبرز کی وجہ سے وہاں کا معاشرہ خراب ہوگیاہے۔ لیکن وہ لوگ کیا کرتے ہیں اور کیا نہیں اس سے ہمارا کوئی لینا دینا نہیں، ہمیں اپنی فلم انڈسٹری دیکھنی ہے۔حمزہ علی عباسی نے کہا کہ انہیں سب سے زیادہ اعتراض آئٹم نمبرز کے لیرکس(شاعری) پرہے مثلاً ’آسْپاری ہوں چبالے مجھے‘، ’میں بلی ہوں نوچ لوں گی‘ اس طرح کی شاعری لوگوں کو خواتین کی طرف متوجہ کرنے کے لیے ہوتی ہے اور ہماری بچیاں اس سے متاثر ہوکر ان ہی کے انداز میں ڈانس کرنے کی کوشش کررہی ہیں جو کہ بہت غلط ہے۔
وائس آف ایشیا19جون 2019 خبر نمبر68




ہریتھک روشن اورکنگنا رناوت کے درمیان لڑائی میں نیا موڑ آگیا

ممبئی(وائس آف ایشیا) ناموربالی ووڈ اداکارہریتھک روشن اورکنگنا رناوت کے درمیان تین برسوں سے چل رہی لڑائی میں نیا موڑ آیا ہے جس نے یقیناً ہرتیھک روشن کو بڑا جھٹکا دے دیا۔اداکارہ کنگنا رناوت اور بالی ووڈ کی نامور شخصیتوں کے درمیان تنازع نیا نہیں، کنگنا رناوت اب تک کرن جوہر، مہیش بھٹ، عالہ بھٹ اورسونوسود سمیت تقریباً پوری بالی ووڈ انڈسٹری سے لڑچکی ہیں، لیکن ان کی سب سے مشہور لڑائی اداکار ہرتھیک روشن کے ساتھ ہے جس کا آغاز تین برس قبل ہوا تھا۔ تاہم یہ لڑائی وقت کے ساتھ ساتھ ٹھنڈی پڑتی گئی اور کافی عرصے سے بالی ووڈ نگری میں اس کی گونج بھی سنائی نہیں دے رہی تھی لیکن اب اس معاملے میں ایک نیا موڑ آیا ہے۔حال ہی میں ہرتھیک روشن کی بہن سنینا روشن نے اپنے ہی بھائی کے خلاف ٹوئٹ کرکے پوری بالی ووڈ انڈسٹری کودنگ کردیا ہے۔ سنینا نے ٹوئٹ کرتے ہوئے لکھا کہ میری ساری حمایت کنگنا کے ساتھ ہے۔ جس کے بعد یہ واضح ہوگیا کہ سنینا نے اپنے بھائی پرکنگنا رناوت کو ترجیح دی ہے۔ ہرتیھک کا اپنی بہن کی اس ٹوئٹ پرتاحال کوئی ردعمل سامنے نہیں آیا ہے۔دوسری جانب کنگنا رناوت کی بہن رنگولی نے چند روزقبل کہا تھا کہ ہرتیھک روشن کی بہن نے انہیں اور کنگنا کو فون کرکے ہرتیھک اور کنگنا کے معاملے پر پہلے آواز نہ اٹھانے کے لیے معافی مانگی ہے۔
وائس آف ایشیا19جون 2019 خبر نمبر69




آغا علی جلدکی بیماری میں مبتلا،سارہ اور کئی رشتہ داروں نے دوری اختیار کر لی

اسلام آباد( وائس آف ایشیا) پاکستانی اداکار آغا علی جلدکی بیماری میں مبتلا ہیں جو ان کی اپنی منگیتر اداکارہ سارہ خان سے بریک اپ کی ایک وجہ بھی بنی۔ذرائع ابلاغ کے مطابق آغا علی نے اپنی جلد کی بیماری بارے بات کرتے ہوئے بتایا کہ انہیں گزشتہ کئی سالوں سے جلدی بیماری سورائسس لاحق ہے، انہوں نے بتایا کہ اس بیماری کی وجہ سے میں کچھ ماہ تک تو ایک کمرے تک محدود ہو گیا تھااور میرے کئی قریبی لوگوں نے مجھ سے کناری کشی اختیار کر لی تھی۔آغا علی نے اپنے حالیہ انٹرویو میں بتایا کہ سارہ خان کیساتھ بریک اپ کی وجہ ایک میری جلد کی بیماری اور دوسری میرا ان کیلئے بہت زیادہ جذباتی ہونا ہے، وہ چاہتی تھیں کہ میں ان کے بعض معاملات میں جذباتی ہوں اور کچھ میں نہیں جو میرے لئے ممکن نہیں تھا۔




ثانیہ مرزا نے وینا ملک کو ٹویٹرسے بلاک کر دیا

اسلام آباد ( وائس آف ایشیا) پاکستانی کرکٹر شعیب ملک کی اہلیہ و بھارتی ٹینس سٹار ثانیہ مرزا نے وینا ملک کو ٹویٹرسیبلاک کر دیا۔میڈیا رپورٹس کے مطابق وینا ملک نے اپنے ٹوئیٹ میں ثانیہ سے کہا تھا کہ وہ اپنے کمسن بچے کو شیشہ بار کیوں لے کر گئیں جس پر ثانیہ نے جوابی ٹوئیٹ میں کہا کہ وہ اپنا بچہ وہاں نہیں لے کر گئیں دوسرا وہ اس کی ماں ہیں اور بہتر جانتی ہیں کہ انھوں نے کیا کرنا ہے بعد ازاں ثانیہ مرزا نے وینا کو ٹویٹر سے بلاک کر دیا۔




راگ رنگ کے بغیر کسی بھی قوم کی ثقافت مکمل نہیں سمجھی جاتی،میگھا

 لاہور( وائس آف ایشیا ) راگ رنگ کے بغیر کسی بھی قوم کی ثقافت مکمل نہیں سمجھی جاتی اور اپنے ملک کی ثقافت کو اجاگر کرنا ہر فنکار فرض ہے ان خیالات کا اظہار معروف سٹیج قاتلہ و بھگڑا کوئین میگھا نے ایک انٹرویو میں کیا انہوں نے کہا کہ لاکھ لاکھ شکر اداکرتی ہوں کہاﷲ پاک نے مجھے اداکاری کے ساتھ ساتھ سْریلی آواز اور سْر سنگیت جیسی نعمت سے نوازا ہے ،ایک سوال کے جواب میں میگھا نے کہا کہ اب تو موسیقی سے دوری پھول سے خوشبو کو دور رکھنے کے مترادف ہے،انہوں نے مزید کہا کہ میدان گلوکاری کا ہو یا اداکاری کا کامیابیاں ان کو ہی ملتی ہیں جن کے جذبے بلند ہوتے ہیں ۔

  




انوشکا شرما نے پولیس افسر بننے کا فیصلہ کر لیا

ممبئی ( وائس آف ایشیا)بولی وڈ میں اس وقت پولیس اہلکاروں پر کئی فلمیں بنائی جارہی ہیں اور اب ایسا محسوس ہورہا ہے کہ انوشکا شرما نے بھی پولیس افسر بننے کا فیصلہ کرلیا ہے۔ویسے تو اب تک بولی وڈ میں سب سے بہترین بولیس اہلکار کا کردار رانی مکھرجی نے اپنی فلم’’مردانی‘‘ میں نبھایا، تاہم کرینہ کپور بھی جلد فلم ’’انگلش میڈیم‘‘ میں پولیس اہلکار کا کردار نبھاکر اس فہرست کا حصہ بن جائیں گی اور اب رپورٹس ہیں کہ انوشکا شرما بھی اپنی اگلی فلم میں یہی کردار ادا کرنے جارہی ہیں-بھارتی میڈیا رپورٹس کے مطابق انوشکا شرما نے طویل عرصے سے کوئی فلم سائن نہیں کی اور اب وہ ایک ایسی فلم سائن کرنے کا ارادہ کررہی ہیں جس میں وہ پولیس اہلکار کا کردار نبھاتی نظر آئیں گی-یاد رہے کہ بولی وڈ میں دبنگ، سنگھم، سمبا اور سوریاونشی جیسی فلمیں بن رہی ہیں، جس میں پولیس اہلکاروں کا کردار کامیاب اداکار سلمان خان، رنویر سنگھ اور اکشے کمار نے نبھایا-سوریاونشی اب تک ریلیز نہیں ہوئی، البتہ سنگھم، دبنگ اور سمبا جیسی فلمیں باکس آفس پر کامیاب ہوئیں-ایسے میں اداکارائیں بھی ان اداکاروں سے پیچھے نہیں-یاد رہے کہ انوشکا شرما کی آخری فلم ’’زیرو‘‘ گزشتہ سال دسمبر میں ریلیز ہوئی تھی-فلم میں ان کے ہمراہ کترینہ کیف اور شاہ رخ خان نے مرکزی کردار نبھایا تھا، البتہ فلم بری طرح باکس آفس پر ناکام ثابت ہوئی-
 




جتنی محبت ‘خلوص اور پیاردوستوں کودیا ایک فیصد بھی واپس نہیں ملا‘اقراء عزیز

کراچی ( وائس آف ایشیا)ڈرامہ ’سنو چندا‘ اور ’رانجھا رانجھا‘ میں بہترین اداکاری کی وجہ سے شہرت پانے والی اقراء عزیز اپنے منفرد انداز اور گفتگو کی وجہ سے اکثر خبروں کی زینت بنی رہتی ہیں حال ہی میں انہوں نے ڈپریشن جیسی بیماری سے نجات پانے کے حوالے سے کہا کہ انہوں نے جتنی محبت، خلوص اور پیار اپنے دوستوں کو دیا اس کے بدلے میں اس کا ایک فیصد حصہ بھی انہیں واپس نہیں ملا، جب کسی کو میری ضرورت ہوتی تھی تو میں بڑھ چڑھ کر مدد کے لیے تیار رہتی تھی لیکن جب مجھے ضرورت ہوتی تھی تو تب کوئی بھی میرے کام نہیں آتا اور یہی وہ باتیں ہیں جوکہ مجھے ڈپریشن میں مبتلا رکھتی تھیں۔




فلم انڈسٹری میں کامیاب انٹری نے مجھے بڑی سکرین کا چسکا ڈال دیا ہے‘ نیلم منیر

 لاہور( وائس آف ایشیا) ٹی وی اور فلم کی خوبرو اداکارہ نیلم منیر نے کہا ہے کہ فلم انڈسٹری میں کامیاب انٹری نے اب مجھے بڑی سکرین کا چسکا ڈال دیا ہے اور میں مستقبل میں بھی بہترین اسکرپٹ کی حامل فلموں میں کام کروں گی ، پہلی فلم ’’ چھپن چھپائی ‘‘ میں احسن خان اوردوسری فلم ’’ رانگ نمبر ٹو ‘‘میں سمیع خان نے میرے مد مقابل کام کیا او رمیں سمجھتی ہوں کہ ’’خانز‘‘ میرے لئے لکی ثابت ہوئے ہیں ۔ ایک انٹرویو میں نیلم منیرنے کہاکہ یاسر نواز نے ’’رانگ نمبر ٹو ‘‘ کے تمام اداکاروں سے دوستانہ ماحول میں اپنی مرضی کے مطابق کام لیا اور یاسر نواز مسلسل تین عیدوں پر کامیاب فلمیں پیش کر کے کامیاب ہدایتکاروں کی فہرست میں شامل ہو چکے ہیں۔ ’’ رانگ نمبر ٹو ‘‘ کی کامیابی سے میرے حوصلہ بڑھا ہے اور یقینی طو رپر یہ کہا جا سکتا ہے کہ مستقبل میں ٹی وی کے ساتھ فلموں میں بھی کام جاری رکھوں گی۔ نیلم منیر نے کہا کہ فلم اب تک 16کروڑ روپے کا بزنس کرچکی ہے جو کسی فلم کی کامیابی کا منہ بولتا ثبوت ہوتا ہے اور مزید شاندار بزنس کرے گی ۔ نیلم منیر نے کہا کہ ٹی وی پر کام کرتے ہوئے کبھی سوچا بھی نہیں تھاکہ میں فلموں میں اداکاری کروں گی اور فلم انڈسٹری میں کامیاب انٹری سے مجھے بڑی سکرین کا چسکا پڑگیا ہے ۔نیلم منیر نے ایک سوال کے جواب میں کہا کہ کراچی سے تعلق رکھنے والے دو فلمسازوں نے اپنے پراجیکٹس میں کام کرنے کی پیشکش کی ہے مگر میں اسکرپٹ میں اپنے کردار کا جائزہ لینے کے بعد حتمی فیصلہ کروں گی۔
 




ورن دھون کی فلم ’’کولی نمبر ون‘‘اگلے سال یکم مئی کو ریلیز ہو گی

ممبئی ( وائس آف ایشیا) 2012 میں فلم’’اسٹوڈنٹ آف دی ایئر‘‘ کے ساتھ ڈیبیو کرنے والے ورن دھون کی ایک کے بعد ایک 11 فلمیں کامیاب ثابت ہوئیں، جبکہ ’’کلنک‘‘ ان کے کیریئر کی پہلی فلم تھی جو باکس آفس پر ناکام رہی۔32 سالہ ورن دھون کا اس حوالے سے کہنا تھا کہ کبھی ایسا ہوتا ہے کہ کوئی پروجیکٹ کامیاب نہیں ہوتا اور پھر اس کا اثر ہر چیز پر ہوتا ہے، ایسا پہلی بار ہوا ہے کہ میری کوئی فلم ناکام ہوئی ہو اور اس کا اثر مجھ پر پڑا ہے۔اداکار نے بتایا کہ وہ اپنی اگلی فلم’’اسٹریٹ ڈانسر‘‘ کے لیے بیحد پرجوش ہیں۔اس فلم کی ہدایات ریمو ڈی سوزا دے رہے ہیں جس میں وہ شردہا کپور کے ساتھ کام کرتے نظر آئیں گے۔ورن بہت جلد فلم ’’کولی نمبر ون‘‘ کے سیکوئل کی شوٹنگ کا بھی آغاز کریں گے، جس کی ہدایات ان کے والد ڈیوڈ دھون دیں گے جو اگلے سال یکم مئی کو ریلیز ہوگی۔
 




اداکار دانش تیمور بالی ووڈ جاتے جاتے رہ گئے

کراچی( وائس آف ایشیا) اداکار دانش تیمور نے انکشاف کیا ہے کہ انہیں بالی ووڈ فلم ’’ویرے دی ویڈنگ‘‘میں کرینہ کپور کے ساتھ مرکزی کردار کی پیشکش ہوئی تھی۔فلم ’’رانگ نمبر‘‘،’’مہرالنسا وی لب یو‘‘اور ’’وجود‘‘ میں اداکاری کے جوہر دکھانے والے اداکار دانش تیمور بالی ووڈ جاتے جاتے رہ گئے۔ حال ہی میں ایک انٹرویو کے دوران دانش تیمور نے انکشاف کیا ہے کہ انہیں فلم ’’ویرے دی ویڈنگ‘‘میں کرینہ کپور کے مقابل مرکزی کردار اداکرنے کی پیشکش ہوئی تھی جسے انہوں نے فراخ دلی سے قبول بھی کرلیا تھا۔بات اتنی آگے بڑھ چکی تھی کہ شوٹنگ کی تاریخیں اور پیسوں کے معاملات بھی طے پاگئے تھے لیکن عین موقع پر کرینہ کپور امید سے ہوگئیں اورفلم کی تاریخیں آگے بڑھ گئیں۔کرینہ کے بیٹے تیمور کی پیدائش کے بعد جب کرینہ شوٹنگ کے لیے تیار ہوئیں تو پاکستان اور بھارت کے درمیان کے درمیان صورتحال کشیدہ ہوگئی اور یوں وہ بالی ووڈ جاتے جاتے رہ گئے۔واضح رہے کہ فلم ’’ویرے دی ویڈنگ‘‘ گزشتہ برس 31 مئی کو ریلیز ہوئی تھی جس میں کرینہ کپور، سوارا بھاسکر، سونم کپور اورشیکھا تلسانیہ نے اداکاری کے جوہر دکھائے تھے، جب کہ کرینہ کے مقابل مرکزی کردار اداکار سومیت ویاس نے اداکیا تھا اور اسی کردار کی پیشکش دانش تیمور کو ئی تھی۔
 




سنی دیول نے شاہ رخ خان سے 16 سالہ ناراضی پر خاموشی توڑ دی

ممبئی( وائس آف ایشیا) بھارتی اداکار سنی دیول نے بالی ووڈ کنگ شاہ رخ سے 16 سالہ ناراضی پر خاموشی توڑ دی۔بھارتی میڈیا کے مطابق سنی دیول نے انٹرویو میں شاہ رخ خان اور فلم ساز یش راج سے رنجشوں پر لب کشائی کرتے ہوئے کہا کہ 1993ء میں فلم ’ڈر‘ کی شوٹنگ جاری تھی جہاں ایک سین میں شاہ رخ خان کو مجھے چاقو مارنا تھا اس سین پر مجھے اعتراض تھا اور میں نے اپنا یہ اعتراض یش راج جی کے سامنے بھی رکھا اور انہیں بتایا کہ میں فلم میں کمانڈو آفیسر کا کردار ادا کر رہا ہوں جوکہ ایک انتہائی فٹ شخص ہوتا ہے تو پھر یہ کیسے ممکن ہوسکتا ہے کہ ایک عام شخص باآسانی کمانڈو پر وار کردے۔سنی دیول نے یہ بھی کہا کہ وہ شخص مجھے تب پیٹ سکتا ہے جب میں اسے دیکھ نہ پا رہا ہوں یا میری توجہ کہیں اور ہو اور میری تمام تر توجہ اس پر ہونے کے باوجود وہ پھر بھی مجھے چاقو سے وار کردے تو میں اپنے آپ کو کمانڈو کیسے کہوں؟اداکار نے یہ بھی کہا کہ یش راج کو تمام صورتحال بتانے کے دوران میں بہت غصے میں تھا میں نے انہیں اور کچھ نہیں کہا کیوں کہ میں اْن کی عزت کرتا ہوں، اْس دوران غصے میں ہونے کی وجہ سے میں نے اپنا ہاتھ جیب میں رکھا ہوا تھا شدید غصے میں ہونے کی وجہ سے مجھے اندازہ ہی نہیں ہوا کہ میرے ہاتھوں کی وجہ سے پینٹ کی جیب پھٹ گئی تھی۔سنی دیول سے صحافی نے سوال کیا کہ کیا وہ 16 سال سے اسی وجہ سے شاہ رخ خان سے ناراض ہیں اور بات نہیں کر رہے جس پر سنی نے تردید کرتے ہوئے کہا کہ یہ وجہ نہیں ہے بلکہ میں نے خود ہی کنارہ کشی اختیار کرلی تھی۔ سچ بات تو یہ بھی ہے کہ میں کسی سے ملتا جلتا نہیں ہوں۔واضح رہے کہ 1993ء میں بننے والی مقبول ترین فلم ’ڈر‘ میں شاہ رخ خان کا کردار آج بھی اْن کے مداحوں کو یاد ہے۔ فلم میں شاہ رخ کے ساتھ سنی دیول اور جوہی چاولہ نے مرکزی کردار ادا کیا تھا۔
 




بالی ووڈاداکارہ انوشکا شرما طویل عرصے بعد واپسی ، نئی فلم میں پولیس اہلکار کا کردار نبھائینگی

ممبئی( وائس آف ایشیا) انوشکا شرما نے طویل عرصے سے کوئی فلم سائن نہیں کی اور اب وہ ایک ایسی فلم سائن کرنے کا ارادہ کررہی ہیں جس میں وہ پولیس اہلکار کا کردار نبھاتی نظر آئیں گی.یاد رہے کہ بولی وڈ میں دبنگ، سنگھم، سمبا اور سوریاونشی جیسی فلمیں بن رہی ہیں، جس میں پولیس اہلکاروں کا کردار کامیاب اداکار سلمان خان، رنویر سنگھ اور اکشے کمار نے نبھایا.سوریاونشی اب تک ریلیز نہیں ہوئی، البتہ سنگھم، دبنگ اور سمبا جیسی فلمیں باکس آفس پر کامیاب ہوئیں.ایسے میں اداکارائیں بھی ان اداکاروں سے پیچھے نہیں.یاد رہے کہ انوشکا شرما کی آخری فلم ‘زیرو’ گزشتہ سال دسمبر میں ریلیز ہوئی تھی.فلم میں ان کے ہمراہ کترینہ کیف اور شاہ رخ خان نے مرکزی کردار نبھایا تھا، البتہ فلم بری طرح باکس آفس پر ناکام ثابت ہوئی۔




فلم باجی کا دوسرا گانا بدلاں ریلیز

اسلام آباد( وائس آف ایشیا)پاکستانی اداکارہ میرا کی فلم باجی کا دوسرا گانا بدلاں ریلیز کر دیا گیا۔ذرئع ابلاغ کے مطابق ہدایت کار ثاقب ملک کی بطور ہدایت کار پہلی فلم باجی کے پہلے گانے کھلتی کلی کے بعد دوسرا گانا بدلاں بھی ریلیز کر دیا گیا ہے جو ایک خوبصورت پنجابی گانا ہے جسے گلوکارہ زیب بنگش اور سعد سلطان نے گایا ہے جس کے بول شکیل سہیل نے لکھے ہیں جبکہ یہ گانا آمیہ الیاس اور میرا جی پر فلمایا گیا ہے جس میں آمنہ الیاس کو میرا جی(شمیرا) کی اسٹنٹ کے طور پر نئی اور پرتعیش زندگی شروع کرنے کے لئے بہیت پرجوش دکھایا گیا ہے۔فلم میں عثمان خالد بٹ، محسن عباس حیدر، علی کاظمی، نیئر اعجاز، نشو بیگم اور دیگر اداکار شامل ہیں جبکہ فلم 28جون کو ریلیز کی جائے گی۔




بیکری نے آرڈر کے کیک پر گلوکارہ ماریہ کیری کی بجائے میری کیوری کی تصویر بنادی

لندن(وائس آف ایشیا) ماریہ کیری اس عہد کی مشہور گلوکارہ ہیں اور ان کے مداح نے جب ان کی تصویر والے کیک کا آرڈر دیا تو غلط فہمی کی بنا پر بیکری نے سالگرہ کے کیک پر مشہور کیمیاداں اور نوبیل انعام حاصل کرنے والی پہلی خاتون میری کیوری کی تصویر بنادی۔ٹویٹر پر ہیریئٹ لائے نامی ایک شخص نے کیک کی تصویر پوسٹ کرتے ہوئے کہا ، ’ برطانیہ میں میرے کزن نے اپنی سالگرہ پر ماریہ کیری کی تصویر والے کیک کا آرڈر دیا جو ماریہ کا مداح ہے۔ تاہم کیک پر گلوکارہ کی بجائے مشہور خاتون سائنسداں میری کیوری کی تصویر بنائی گئی تھی جو بہت بھلی معلوم ہورہی تھی۔میری کیوری کو ایک مرتبہ کیمیا اور دوسری مرتبہ طبیعیات پر نوبیل انعام سے نوازا گیا اورانہوں نے تابکاری بھی دریافت کی تھی۔ کیک پر تصویر دیکھ کر کہا ہے کہ یہ ماریہ کیری کی تصویر سے بھی بہتر ہے۔
 

 




نانا پاٹیکر کی بے گناہی‘ تنوشری دتہ وزیراعظم مودی پر بھڑک اْٹھیں

ممبئی(وائس آف ایشیا) بھارتی اداکارہ تنوشری دتہ نے جنسی ہراسانی کے معاملے میں نانا پاٹیکر کو کلین چٹ ملنے پر وزیر اعظم نریندر مودی پر برہمی کا اظہار کیا ہے۔بھارتی میڈیا کے مطابق تنوشری دتہ نے کہا کہ نانا پاٹیکر اور اْن کے لوگوں نے پولیس کو نئی رپورٹ بنانے اور مجھے جھوٹا قرار دینے کے لیے کتنے پیسے دیئے؟ میں مجسٹریٹ سے پوچھنا چاہتی ہوں کہ اس طرح کی جھوٹی اور بے بنیاد رپورٹ بنانے کے لیے آپ نے کتنی رقم وصول کی؟اداکارہ نے یہ بھی کہا کہ ہراسانی کے واقعہ کے بعد سے میرا کام اور میرا مستقبل ختم ہوگیا ہے یہاں تک کہ میں اپنی تمام زندگی دوسرے ملک میں گزارنے پر مجبور ہوں کیوں کہ بھارت میں انصاف اور قانون بکتا ہے، یہاں ملزمان جرم کرنے کے باوجود بھی خود کو کلین چٹ دلوانے کے لیے کروڑوں روپے رشوت دیتے ہیں اور اگر کوئی شخص بھرے بازار لوگوں کے سامنے ہراسانی کا شکار ہونے کے بعد بھی انصاف کے لیے آواز اْٹھاتا ہے تو اسے جھوٹا قرار دے دیا جاتا ہے۔اداکارہ نے نریندر مودی کو مخاطب کرتے ہوئے کہا کہ کیا ہوا آپ کے کرپشن فری بھارت کا؟ اس ملک کی بیٹی کو ایک ایسے شخص نے اپنی ہراسانی کا نشانہ بنایا ہے جو اس سے پہلے بھی کئی لڑکیوں پر حملہ کر چکا ہے اور اس کے بدلے میں ایک ہجوم نے گھیر کر بد تمیزی کا نشانہ بنایا، میرا کیرئیر تباہ ہوگیا مجھ پر دباؤ ڈالا گیا اور مجھے ملک سے باہر جانے کے لیے دھمکیاں بھی دی گئیں۔تنوشری دتہ نے یہ بھی کہا کہ آپ کی پولیس یہ کہہ رہی ہے کہ میری درخواست غلط اور بے بنیاد ہے کیا یہ آپ کا رام راج ہے ؟ پوجا کرنے والے ہندو خاندان میں پیدا ہونے کے باوجود سچ کے بجائے جھوٹ کی جیت کیوں ہو رہی ہے؟ جواب دیجیے مجھے۔واضح رہے کہ تنوشری دتہ نے گزشتہ سال نانا پاٹیکر کے خلاف شکایت درج کرائی تھی جس میں یہ کہا گیا تھا کہ نانا پاٹیکر نے 2008ء میں بننے والی فلم ’ ہارن اوکے پلیز‘ کی شوٹنگ کے دوران انہیں کئی بار جنسی طور پر ہراساں کرنے کی کوشش کی تھی۔
 




عید الفطر پر پنجابی فلموں کی کامیابی کے بعد نئی فلمیں بنانے کے حوالے سے سوچ بچار

 لاہور(وائس آف ایشیا)عید الفطر پر نمائش کی جانے والی دو پنجابی فلموں کی کامیابی کے بعد نئی فلمیں بنانے کے حوالے سے سوچ بچار شروع کر دی گئی ۔ عید الفطر پر اداکار حیدر سلطان اور معمررانا کی دو پنجابی فلمیں شریکے دی اگ ‘‘ اور ’’ پیشی گجراں دی ‘‘ پیش کی گئیں جنہیں فلم بینوں کی جانب سے پذیرائی ملی ہے ۔ ذرائع کے مطابق کامیابی کے رجحان کو دیکھتے ہوئے کچھ پروڈیوسرزکی جانب سے نئی فلمیں بنانے کے حوالے سے مشاورت کا آغاز کردیا گیا ہے اور آنے والے دنوں میں اس حوالے سے حتمی معاملات سامنے آئیں گے۔ ذرائع کے مطابق فلم انڈسٹری کے لیجنڈ سلطان راہی مرحوم کے صاحبزادے حیدر سلطان پنجابی فلموں کی بحالی کیلئے بھرپور کاوشیں کر رہے ہیں اور اس کے لئے انہوں نے مختلف شخصیات سے ملاقاتیں بھی شرو ع کر رکھی ہیں۔
 




گلوکاری کیساتھ ٹی وی پر میزبانی کا تجربہ کامیاب رہاہے ‘ حدیقہ کیانی

لاہور(وائس آف ایشیا) گلوکارہ حدیقہ کیانی نے کہا ہے کہ گلوکاری کے ساتھ ٹی وی پر میزبانی کا تجربہ کامیاب رہاہے ، ماضی میں بچوں کے پروگرام میں شریک میزبان کے طو رپر کام کر چکی ہوں اس لئے مجھے طویل وقفے کے بعد میزبانی کے فرائض سر انجام دیتے ہوئے کوئی مشکل پیش نہیں آئی ۔ حدیقہ کیانی نے کہا کہ جس طرح فلم ، ٹی وی ، اسٹیج اور گلوکاری کے فن کے رموز الگ الگ ہیں اسی طرح میزبانی بھی ایک فن ہے جس میں میزبان نے پورے پروگرا م میں توازن قائم رکھنا ہوتا ہے اور اس کے علاوہ اسے آگاہی بھی حاصل ہونی چاہیے ۔ آپ اگر کسی مہما ن کو مدعو کر رہے ہیں تو اس کے کیرئیر کے بارے میں بھی آگاہی ہونی چاہیے تبھی آپ بات سے بات کو آگے بڑھا سکتے ہیں۔
 




خلائی مخلوق کیخلاف سینہ سپر خفیہ اہلکار باکس آفس پر چھا گئے

نیویارک (وائس آف ایشیا) خلائی مخلوق کیخلاف سینہ سپر خفیہ اہلکار باکس آفس پر چھا گئے، ہالی وڈ ایکشن فلم ’’مین ان بلیک فور‘‘ نے پہلے ہفتے دو کروڑ پچاسی لاکھ ڈالر کما لئے۔ہالی وڈ کی ایکشن سے بھرپور فلم ’’مین ان بلیک فور‘‘ کا باکس آفس پر راج پہلے تین روز میں ریکارڈ کمائی کر لی۔پالتوجانوروں کی شرارتوں پر بنی فلم ’’دی سیکرٹ لائف آف پیٹس ٹو‘ نے دو کروڑ اڑتیس لاکھ ڈالر کمائے ہیں۔ جادوئی چراغ کے جن کی کہانی فلم الہ دین نے ایک کروڑ سرسٹھ لاکھ ڈالر بزنس کر کے باکس آفس پر تیسری پوزیشن حاصل کی ہے۔
 




وینا ملک سے دوستی کا قصہ ماضی کا حصہ بن چکا ہے ‘ ببرک شاہ

لاہور(وائس آف ایشیا) نامور اداکار ببرک شاہ نے کہا ہے کہ وینا ملک سے دوستی کا قصہ ماضی کا حصہ بن چکا ہے ، اب دونوں اپنی اپنی زندگی میں مگن او رخوش ہیں۔ ایک انٹر ویو میں ببرک شاہ نے اپنے کیرئیر کی پہلی فلم میں وینا ملک کے مد مقابل کام کیا جس کے بعد ہماری دوستی ہو گئی او ریہ طویل عرصہ تک قائم رہی ۔ انہوں نے کہا کہ میں وینا ملک سے شادی بھی کرنا چاہتا تھا لیکن انہوں نے ساتھ نہیں دیا ۔ ببرک شاہ نے کہا کہ وینا ملک نے بھارت میں فلم کا معاہدہ کرلیا او ر مجھے فون پر بتایا کہ میں فلم کرنے کے لئے بھارت جارہی ہوں جس کے بعد اختلافات پیدا ہو گئے اور پھر دوستی میں دڑاڑ آ گئی ۔ ببرک شاہ نے کہا کہ جو جہاں ہے میں سب کی خوشی کے لئے دعا گو ہوں ۔