Voice of Asia News

ڈر ہے پنجاب اسمبلی اجلاس تماش بینوں کے ہاتھ نہ چڑھ جائے ؛ چوہدری شجاعت

لاہور(وائس آ ف ایشیاء) مسلم لیگ ق کے سربراہ چوہدری شجاعت حسین نے اسپیکر پرویز الہیٰ کی زیر صدارت پنجاب اسمبلی بلڈنگ میں ہونے والے اجلاس کی حمایت کردی ، انہوں نے کہا ہے کہ ڈر ہے کہ پنجاب اسمبلی اجلاس تماش بینوں کے ہاتھ نہ چڑھ جائے ۔ تفصیلات کے مطابق اپنے ایک بیان میں سابق وزیر اعظم نے کہا کہ شاید حکومت نے اسمبلی اختیارات محدود کرنے کیلئے ایوان اقبال میں اجلاس بلایا ، ارکان پنجاب اسمبلی بلڈنگ والے اجلاس میں جائیں اور اختیارات کا تحفظ کریں۔ انہوں نے کہا کہ آج کل سیاست تماش بینوں کے ہتھے چڑھ گئی ہے ، ڈر ہے کہ پنجاب اسمبلی اجلاس تماش بینوں کے ہاتھ نہ چڑھ جائے ، تماش بین ملک کا تماشہ بنانے کی کوشش کررہے ہیں ، تماش بین اپنا تماشہ لگا رہے ہیں وہ قوم کو تماشہ نہ بنائیں۔ ادھر پاکستان تحریک انصاف کے رہنماء اور سابق وفاقی وزیر فواد چوہدری نے کہا ہے کہ گورنر کا جاری کردہ آرڈیننس مارشل لا کا اعلان ہے ، انہوں نے کہا کہ ن لیگ اور پیپلز پارٹی اتحاد نے آج یہ عجیب و غریب کارنامہ سرانجام دے دیا ، مارشل لاء حکومت میں بھی کبھی یہ نہیں کہا گیا کہ اسمبلی انتظامیہ کے ماتحت ہو گی ، اب جدوجہد جمہوریت کی بحالی کی ہے ، آمریت کےخاتمے کیلئے ہر قربانی دیں گے۔ واضح رہے کہ پنجاب اسمبلی کی آزادانہ حیثیت ختم کردی گئی ہے اور محکمہ قانون کو خصوصی اختیارات سونپ دیے گئے ہیں ، اس ضمن میں گورنر پنجاب بلیغ الرحمان کی جانب سے آرڈیننس بھی جاری کردیا گیا ہے ، جس کے تحت اب اسمبلی سیکریٹریٹ کے سارے فیصلے محکمہ قانون کرے گا۔ بتایا گیا ہے کہ گورنر پنجاب بلیغ الرحمان کی جانب سے جاری آرڈیننس کے تحت محمد خان بھٹی کو بھی سیکرٹری قانون کے تابع کردیا گیا ہے ، آرڈیننس کے تحت محکمہ قانون کے تمام معاملات سیکرٹری قانون احمد رضا سروردیکھیں گے اور اب جب بھی گورنر کی جانب سے اجلاس طلب کیا جائے گا تو محکمہ قانون اس کا نوٹی فکیشن جاری کرے گا ۔ یاد رہے کہ حکومت اور اپوزیشن کے درمیان مذاکرات کے پانچ دور ہونے کے باوجود ڈیڈ لاک ختم نہ ہوسکا جس کے باعث پنجاب کا آئندہ مالی سال 2022-23کا بجٹ دوسرے روز بھی پیش نہ کیا جا سکا ، گورنر کی جانب سے پنجاب اسمبلی کا 40 واں اجلاس برخاست کر کے 41 واں اجلاس بدھ کے روز سہ پہر تین بجے ایوان اقبال میں طلب کر لیا گیا جس میں آئندہ مالی سال کا بجٹ پیش کیا جائے گا۔

image_pdfimage_print
شیئرکریں