واشنگٹن (وائس آف ایشیا) امریکی صدر ڈونلڈ ٹرمپ کی بھارتیوں سے ناراضگی برقرار ہے اور اب انہوں نے بھارت کو جہنم جیسی جگہ کہہ دیا۔ اپنے سوشل میڈیا پلیٹ فارم ٹروتھ سوشل پر جاری ایک بیان میں امریکی شہریت سے متعلق کیس پر انہوں نے کہا کہ آج سپریم کورٹ کے سامنے پیدائشی حق شہریت کے بارے میں دلائل سن کر مجھے کچھ غصہ آیا کیونکہ میں نے جو کچھ سنا اس میں میرے لیے زیادہ توجہ طلب یہ تھا کہ وہ شخص جو امریکہ کو غیر قانونی غیرملکیوں کے ساتھ آباد کرنے کے حق میں دلائل پیش کر رہا ہے تاکہ آبادی کو ہمیشہ کے لیے تبدیل کیا جا سکے وہ ایک چینی امریکی تھا، جو مجھے بہت ہوشیار، بہت شریر اور بہت منحرف لگتا ہے۔
صدر ٹرمپ کا کہنا ہے کہ یہ اٹارنی سانپ کا سر ہے، جو پھر سے امریکہ کو سیس پول میں تبدیل کرنے کی کوشش کر رہے تھے، ہم سب جانتے ہیں کہ ان دلائل کو کمرہ عدالت کے خلاصہ کے طور پر بیان نہیں کیا جانا چاہئے، یہ واقعی قانون کے بارے میں نہیں ہے، یہ رائے عامہ کے بارے میں ہے، ہم آئین میں ترمیم نہیں کرسکتے کیونکہ یہ پتھر پر لکیر ہے، اور اگر ہم ایسا کرتے ہیں، تو وہ ہماری پہلی اور دوسری ترمیم چھین لیں گے، جو وہ کریں گے۔
امریکی صدر نے مزید کہا کہ یہی تو مسئلہ ہے کہ آئین ہوائی سفر ایجاد ہونے سے پہلے لکھا گیا تھا، یہ کہنے کی ضرورت نہیں کہ ٹیلی ویژن سے پہلے، انٹرنیٹ سے پہلے، ریڈیو سے پہلے، اور آپ یہ کہہ سکتے ہیں کہ جب لوگ حمل کے نویں مہینے میں ہوائی جہاز کے ذریعے یہاں آتے ہیں تو یہاں جنم لینے والا ایک بچہ فوری طور پر شہری بن جاتا ہے اور پھر وہ پورے خاندان کو چین یا بھارت یا کرہ ارض پر کسی اور جہنم سے یہاں لاتے ہیں، یہاں اب انگریزی نہیں بولی جاتی کیوں کہ یہاں آنے والے تارکین وطن طبقے میں اس ملک کے لیے تقریباً کوئی وفاداری نہیں ہے۔